უკანსანკნელი დღეებია ამერიკელები გაუსაძლის ყინვებს ებრძვიან. როგორც იქაურმა სინოპტიკოსებმა ბრძანეს: ასეთი ყინვები კოლუმბმა რომ გვნახა მას მერე არც ყოფილაო (მანამდე რა იყო აბა ჩვენ რა ვიცითო). მთელი სამთავრობო უწყება მიზეზს ეძებს თუ რატომ მოხდა ეს. ერთ-ერთმა კონგრესმენმა თქვა: მგონი ალ-ქაიდაა და ყინვა გვგონიაო, მეორემ მუჯლუგუნი მიჰკრა, ხო გითხარ შეეშვი ავღანეთში სიარულს და რაღაცეების მოწევას-მეთქი. აშშ-ში ჭორი დადის აბორიგენმა შამანებმა მოახდინეს ეს ყველაფერი, შურისძიების მიზნითო. ვერსია ბევრია, მაგრამ ერთ რამეზე ყველა თანხმდება, რომ პრობლემა ზეციდან მოვიდა........17 ნოემბრის შემდეგ საქართველოდან წავიდა და არ დაბრუნებულა ექს-პრეზიდენტი სააკაშვილი, მისი გაუჩინარება საეჭვოდ ემთხვევა აშშ-ში ამინდების არევას, თანაც გავიხსენოთ: პრობლემა ზეციდან მოდისო, სააკაშვილის ხომ ზეციდან ანუ თვითმფრინავიდან ჩაფრინდა ამერიკაში?! დავესესხები დიდ ქართველ პოლიტიკოსს მიხეილ-გელა სალუაშვილის და მისეულად ავხსნი სახელს - მიშა.
მ – ქართული ანბანის 13-ე ასო ბგერა. 13 რიცხვი თავისთავად თარსია
ი – ქართული ანბანის 10-ე ასო ბგერა. 10 ახლოს დგას ცამეტთან და თავისთავად ესეც თარსი გამოდის
შ – ქართული ანბანის 28-ე ასო ბგერა. 13*2=26, ხოლო 28 ძალიან ახლოს დგას ოცდაექვსთან და შესაბამისად ორმაგად თარსია
ა – ქართული ანბანის პირველი ბგერა, რომ არა პირველი იქნებოდა მეცამეტე?!
გამოდის რომ სახელი მიშა, მეტად დიდი უარყოფითი ველის მატარებელია. როდესაც ამ დასკვნამდე მივედი გავიხსენე ბატონი მიხეილის ძველი ვოიაჟები და...
სააკაშვილი უკრაინაში, ევრო მაიდანზე – გაუსაძლისი ყინვა
სააკაშვილი რუსეთში – მოსახლეობას თავს დაატყდა პუტინის რეჟიმი
სააკაშვილი სომხეთში – სპიტაკის მიწისძვრა (აქ ბუნებამ შეასრულა წინასწარმეტყველის როლი, რამეთუ ათეული წლებით ადრე განსჭვრიტა რომ ის სომხეთში ჩავიდოდა)
სააკაშვილი უკრაინაში (სტუდენტობისას) – ჩერნობილის აფეთქება
სააკაშვილი არა მარტო თავისი ადგილზე ჩასვლით ახდენდა გავლენას არამედ გაფიქრებითაც. 2011 წლის მარტში მან გაიფიქრა: მოდი იაპონიაში წავალო და ცუნამიც გამოიწვია, რომლის დამანგრეველ შედეგებს დღესაც ებრძვიან.
ეს მხოლოდ ჩამონათვალი თუ რისი გაკეთება შეუძლია მას. ამიტომ მე მინდა ჩვენ ხელისუფლებას ვთხოვო, რათა დროულად ჩააყენონ საქმის კურსში ამერიკელი კოლეგები, რომ თავიდან აიცილონ შემდგომი კატაკლიზმები (რა ამის პასუხია და კატაკლიზმებს, კატაოყნები არ ჯობს?!), ამავე დროს მიმართონ გაერთიანებული ერების ორგანიზაციას ან “ნატოს”, რათა მათ საკუთარი შეიარაღებული ძალების შეიარაღებაში შეიტანონ ისეთი გამანადგრუებელი იარაღი, როგორიცაა მიხეილ სააკაშვილი.
პ.ს. თურმე რას ვუძლებდით 9 წელი...
პ.ს.ს. მარგველაშვილი ხომ გყავს უკეთესი (მე არავინ მყავს, ჩემ ძაღლ “ბიჭიკოს” გარდა – სურამელი); თქვენი ღვარძლით მიშას ამაგს ვერ დაჩრდილავთ; ეს ყველაფერი არის ტყუილი,აბა სად სპიტაკის მიწისძვრა და სად სააკაშვილი? არ ეკადრება “კვირის პალიტრას” ასეთი გადაუმოწმებელი მონაცემების დაწერა, და კიდევ სხვა, მსგავსი კომენტარებისგან თავი შეიკავეთ და გაითვალისწინეთ, რომ თვით დიდ მიხეილზეც შეიძლება იხუმროთ რამეთუ ჭეშმარიტმა მიშისტმაც უწყის, რომ “საგუშაგო მიშას” მორიგი ნომერი აღარ გამოვა!
No comments:
Post a Comment